Siglir tar il cuntegn

Header

cuntegn

Cuppa da ballape FCZ ed FCB cun stgarsas victorias

  • Il FCZ sa mudregia tar ils Black Stars. Il gol da la victoria croda pir en la 83avla minuta.
  • Basilea sto dar ina mesadad cunter Pully cun in um pli pauc, gudogna tuttina cun 4:1 ed er Son Gagl gudogna 4:1 cunter Monthey.
  • Servette n'ha nagina fadia cunter Echallens ed er Sion n'ha nagins problems cunter Allschwil.
trais ballapedists sa legran d'avair gudagnà
Legenda: Nathan da Turitg (a mez) lascha gratular ses collegs per ses gol da la victoria. Keystone

Black Stars Basilea - FC Turitg 1:2

Cunter il represchentant da la Promotion League ha Turitg sajettà l'emprim gol suenter 10 minutas. Be paucas secundas avant ha Mimoun Mahi betg realisà in penalti. In sbagl dal goli Andris Vanins ha nizzegià Deny Gomes en la 21avla minuta ed egualisà al 1:1. Il gol da la victoria ha sajettà il defensur Nathan en la 83avla minuta.

Pully - Basilea 1:4

Mussà sia fermezza ha Basilea, la finala era la victoria tuttina betg uschè simpla. Quasi cun la tschivlada da pausa ha Basilea stuì prender encunter il gol al pari dad 1:1. Raoul Petretta (FCB) ha survegnì la carta cotschna suenter tutgà la balla cun il maun. Curt suenter pausa ha Kevin Bua lura sajettà ses segund gol. Vitiers ha el sajettà 10 minutas avant la fin il gol decisiv al 3:1. Samuele Campo ha lura anc sajettà il 4:1 cun penalti.

Ils giugaders da Basilea engrazian a lur fans.
Legenda: Ils giugaders da Basilea engrazian a lur fans. Keystone

Monthey - Son Gagl 1:4

Sumegliant sco Pully èsi er gartegià a Monthey dal Vallais dad egualisar al 1:1. Silsuenter ha lur l'equipa da la Super League mussà pli e pli fitg lur potenzial. Dereck Kutesa, Cedric Itten ed Angelo Campos han la finala procurà per ina clera victoria.

ballapedists en tenue vers
Legenda: Son Gagl ha dominà la partida. Keystone

Allschwil - Sion 1:10

Ina victoria indiscutabla ha Sion realisà en il chantun Basilea. Cunter Allschwil da la 2. liga interregiunala ha Pajtim Kasami fatg perfetg en la 75avla minuta il «Stängeli» al 10:0. Curt avant la fin ha Allschwil anc pudì sajettar il gol onuraivel.

quatter ballapedists gratuleschan in a l'auter sin in gol
Legenda: Pajtim Kasami ha sajettà il 10:0. Keystone

Echallens - Servette 0:6

Er ina victoria suverana hai dà per Servette. Echallens da la 1. liga ha en l'emprima mesadad anc pudì tegnair pitg al club da la Super League e laschà tiers be pauc avant pausa. La finala è lura la differenza da classa stada cleramain vesaivla.

RR novitads 21:00