Siglir tar il cuntegn

Header

purtet dal giugader da tennis svizzer Marco Chiudinelli
Legenda: Igl è stà in dir cumbat e senza happy end per Marco Chiudinelli. Keystone
cuntegn

Naziunal/Internaziunal Cuppa Davis: Terrada erocia per Chiudinelli

Marco Chiudinelli ha pers l'emprim gieu da la Cuppa Davis a Turitg cunter l'Italia. La Svizra è uschia cun 0:1 en retard. Chiudinelli ha pers cunter Paolo Lorenzi suenter 4 uras e 43 minutas en 5 sets cun 6:7, 3:6, 6:4,7:5 e 5:7.

Il Basilais da 34 onns ha pers ils emprims dus sets e lura pudì egualisar. En il set decisiv ha el manà cun 5:2. (en il video è da vesair la balla da break al 4:2 per Chiudinelli). Suenter quai ha Chiudinelli stuì sa laschar tractar medicinalmain ed ha lura pers tut ils games. Tar 5:4 e 0:40 per Chiudinelli ha el schizunt gì trais ballas da match, n'ha dentant betg pudì nizzegiar quai. Gia en il tie-break da l'emprim set ha il Svizzer betg pudì nizzegiar 6 ballas da set. La finala ha Lorenzi gudagnà il tie-break cun 16:14. Igl è stà il tie-break cun ils pli blers puncts dapi l'introducziun da la gruppa mundiala a la Cuppa Davis il 1981.

Era Laaksonen senza schanza

La saira ha lura il Svizzer Henri Laaksonen giugà cunter il numer 1 talian Andreas Seppi. Laaksonen ha pers en quatter sets cun 5:7, 6:7, 6:3 e 3:6.

La Svizra è uschia gia cun 0:2 en retard e sto ussa gudagnar il dubel da sonda ed omadus gieus singuls la dumengia per sa qualifitgar per ils quartfinals.

RR novitads 20:00 / 23:00