Uss èsi definitiv. Quest onn na datti nagina Cuppa Spengler a Tavau. Marc Gianola, il CEO dal HCD, ha confermà quai a RTR. Pervia da la crisa da corona ha il cussegl administrativ dal HCD enturn il president Gaudenz Domenig decidì da betg realisar quest onn il turnier tradiziunal tranter Nadal e Bumaun. L’emprima Cuppa Spengler era vegnida organisada il 1923.
Quest onn avess il turnier gì lieu per la 94avla giada. Uschia èsi pir la tschintgavla giada che quest turnier croda en l’aua.
Medems problems sco las autras occurrenzas grondas
Er cun il meglier concept da segirtad na fissi betg stà pussibel da realisar ina festa da hockey sco giavischà, argumentescha Marc Gianola, il CEO dal HCD, questa decisiun. Emprima prioritad haja adina gì la sanadad dals giugaders e questa garanzia na possian els betg dar, uschia Gianola vinavant.
Il campiunadi svizzer da hockey cumenza percunter gievgia proxima il 1. d’october. Il HCD dat ses emprim gieu il venderdi ordaifer encunter Genevra Servette.
