La premiera a la Cuppa Spengler è gartegiada ad Ambri-Piotta. Cunter l'equipa favurisada dad Ufa han ils Tessinais gudagnà meritadamain cun 4:1. Suenter l'emprim terz stevi, grazia a gols da Sabolic e D'Agostini gia 2:0 per l'equipa da Luca Cereda. En la 24avla minuta ha Marco Müller auzà sin 3:0. Ils Russ èn mo vegnids da scursanir sin 3:1 curt avant la fin dal segund terz.
En l'ultim terz ha Salavat Yulaev Ufa bain empruvà tut da vegnir enavos en il gieu. Ambri ha dentant defendì cun pais e mauns e Daniel Manzato en il gol ha mussà pliras paradas miraculusas. En l'ultima minuta è gartegià ad Ambri anc il 4:1, grazia ad in gol tecnic. Il puck fiss ì en il gol vit, sch'il defensur dad Ufa n'avess betg spustà il gol.
Ils Tessinais pon giudair il venderdi in di liber, fertant che Ufa frunta sin TPS Turku da la Finlanda.
Team Canada batta Trinec
En l'auter gieu da la gievgia saira ha il favurit gudagnà. Il Team Canada ha battì Trinec da la Tschechia cun 4:1. Sco gia ils ultims onns persvada il Team Canada cun in hockey simpel, dentant fitg effectiv. Uschia èn ils Canadais er quest onn il grond favurit per il titel da la Cuppa Spengler.
RTR novitads 06:00