Siglir tar il cuntegn

Header

Buccal da la Cuppa Spengler
Legenda: Tgi va quest onn per il buccal da la Cuppa Spengler? Keystone
cuntegn

Cuppa Spengler cumenza Il Team Canada è puspè il favurit

Il Team Canada, Tavau, Ambri-Piotta, Trinec, Turku ed Ufa èn las equipas che cumbattan quest onn per il titel da la Cuppa Spengler. Mo tgi è il favurit?

Team Canada 30%

Ils Canadais tutgan puspè ina giada tar ils gronds favurits. Cuntrari che per autras equipas n'è la Cuppa Spengler per il Team Canada betg mo in turnier da vacanzas. Per in Canadais datti nagut pli bel e superbi che da pudair dar hockey cun l'ischi sin il pèz.

Sco quasi mintg'onn èn ils Canadais in'equipa fitg rutinada cun blers giugaders ch'han gia dà hockey en la NHL. En il cader da quest onn èn 13 giugaders che dattan en Svizra. Tranter quels èn Chris DiDomenico, Daniel Winnik, Dustin Jeffrey u era Maxime Noreau che tutgan tar ils megliers giugaders da la liga svizra.

Salavat Yulaev Ufa 25%

Equipas da la Russia tutgan adina puspè tar ils favurits a la Cuppa Spengler. Savens trumpeschan ellas dentant. Insatge che manca savens als Russ è l'engaschi e la disciplina. In bun exempel è Metallurg Magnitogorsk stà avant in onn. L'equipa ha dà senza schlantsch ed ha trumpà durant l'entir turnier.

Tuttina èsi bain pussaivel che Ufa fa ina bler meglra figura quest onn. L'equipa è stada il 2007 ed il 2014 en il final da la Cuppa Spengler e cun Linus Omark è da chattar in giugader ch'è in mez scheni sin il glatsch.

In'auter motiv daco che l'equipa russa vegn a sa preschentar meglier quest onn: Per l'emprima giada vegnan ils gieus mussads live a la televisiun russa. Cler che l'equipa da la KHL vul sa mussar da sia meglra vart.

HC Tavau 15%

Il 2011 han ils Grischuns gudagnà la davosa giada lur turnier da chasa. Daco duessi quest onn puspè gartegiar? Suenter la stagiun da horror da l'onn passà, tutga il HCD puspè tar l'elita dal hockey svizzer. Quai er grazia al nov trenader Christian Wohlwend. El vul per tut pretsch auzar en l'aria la trofea ils 31 da december. Quai ha el menziunà pliras giadas las ultimas emnas. Cun ses fieu e sias emoziuns vegn Wohlwend d'infectar sia equipa.

Christian Wohlwend
Legenda: Christian Wohlwend vul gudagnar la Cuppa Spengler cun il HCD. Keystone

Ina chaussa che discurra er per il HCD èn ils giugaders da rinforzament. Cun Danny Kristo, Casey Wellmann (Rapperswil) e Harri Pesonen (SCL Tigers) ha il club chattà giugaders che vegnan a dar schlantsch a l'equipa.

HC Oceláři Třinec 15%

Třinec è gia l'onn passà stà da la partida a la Cuppa Spengler. Quai dentant senza persvader. Che l'equipa sa dentant gudagnar titels han els mussà questa primavaira. Per la segunda giada suenter il 2011 è Třinec vegnì campiun da la Tschechia.

Las premissas èn en mintga cas bunas che l'equipa vegn a far a la Cuppa Spengler 2019 ina meglra parita che l'onn passà. Malgrà ch'ils gronds nums mancan, vala l'equipa da Třinec sco pli ferma che l'onn passà. En il cader èn da chattar dus giugaders che devan ina giada en Svizra. Martin Gernat è stà tar Losanna ed il goli Jakub Stepanek è vegnì campiun svizzer il 2016 cun il SC Berna.

HC Ambri-Piotta 10%

Per ils Tessinais èsi gia in'onur dastgar esser da la partida a la Cuppa Spengler. Mintga giugader e mintga fan sa legra dad esser ina part da quest turnier da tradiziun.

Luca Cereda
Legenda: Luca Cereda vul far furora cun Ambri-Piotta a la Cuppa Spengler. Keystone

Ins dastga esser spanegià tge figura che l'equipa vegn a far sin il glatsch. L'equipa n'è betg la pli talentada, dentant constat l'engaschi sco er la tenuta adina. Sche Ambri-Piotta vegn en schlantsch è l'equipa segir buna per ina u l'autra surpraisa. Uschè u uschia èn ils Tessinais in gudogn per la Cuppa Spengler.

TPS Turku 5%

Turku è actualmain sin l'ultim plaz en la liga finlandaisa. L'equipa na vegn simplamain betg sin turas. Mo 9 da 32 gieus han els gudagnà. Ils gronds temps dal club tutgan tar il passà (2010 ultima giada campiun).

Sumegliant era la situaziun dentant er tar Kalpa Kuopio l'onn passà. Nagin ha quintà ch'els vegnan da far furora. La fin finala ha Kuopio gudagnà surprendentamain la Cuppa Spengler 2018.

Oz è TPS Turku enconuschent sco fuschina da talents. Talents che bandunan savens il club gia en giuvens onns.

RR actualitad 17:00

Artitgels legids il pli savens

Scrollar a sanestra Scrollar a dretga