Ils fans han ditg vesì in gieu fitg guliv cun schanzas sin omaduas varts e cun dus fitg ferms golis. Joren van Pottelberghe tar Tavau sco era Jaku Stepanek tar Trinec han mussà pliras paradas excelentas.
En la 15avla minuta è l’equipa tschecca ida en avantatg entras in gol dad Ondrei Kovarcik. Il HCD ha pers il puck en la zona offensiva e suenter in pass lung ha in attatgader pudì currer persul encunter il gol. Il goli da Tavau Joren van Pottelberghe ha anc pudì parar l’emprim sajet, cunter il segund n’ha el dentant gì nagina schanza.
Igl ha cuzzà fin la 41avla minuta enfin ch’il HCD ha pudì egualisar. En in powerplay ha il giugader da rinforzament dals SCL Tigers, Hari Pesonen sajettà il 1:1. En las ultimas minutas dal gieu è Trinec lura stà l'equipa pli activa e radund 3 minutas avant la fin è gartegià a Milan Doudera il 2:1, quai suenter in sbagl dal defensur da Tavau Magnus Nygren. Ils dus ultims gols han ils Tschecs sajettà en il gol vid.
Il HCD frunta damaun la saira sin il Team Canada. Vul l’equipa far il pass direct en il mezfinal, sto ella gudagnar cun in resultat aut cunter ils Canadais.
Avant il gieu
Il trenader dal HCD Christian Wohlwend ha adina puspè menziunà las ultimas emnas ch'els veglian gudagnar la Cuppa Spengler. Dapi il 2011 spetga Tavau sin ina victoria al turnier da chasa.
L'equipa grischuna dastga segir ir cun optimissem a la partenza tar la 93avla ediziun da la Cuppa Spengler. Cuntrari a l'onn passà, nua che l'equipa era en ina pulita rusna da quest temp, tutga Tavau actualmain puspè tar l'elita dal hockey svizzer.
Cunter Ocelari Trinec ha il HCD valì sco lev favurit. L'adversari è bain campiun da la Tschechia, durant l'emprim gieu cunter il Team Canada n'ha l'equipa da Trinec dentant betg persvadì. In factur che aveva discurrì per Tavau èn ils giugaders da rinforzament. Harri Personen (SCL Tigers) sco er Danny Kristo e Casey Wellman (Rapperswil-Jona Lakers) vegnan a dar ulteriur schlantsch a l'equipa.
RTR novitads 23:00
