Siglir tar il cuntegn

Header

audio
Saira: Christian Wohlwend vul gudagnar Cuppa Spengler
Or da Actualitad dals 27.12.2019.
laschar ir. Durada: 1 minuta 58 Secundas.
cuntegn

Cuppa Spengler «Nus vulain gudagnar quest turnier»

D'uffant guardava Christian Wohlwend adina en la televisiun la Cuppa Spengler. Quest'onn è l'Engiadinais per l'emprima giada sez da la partida al turnier da tradiziun. E cun ses HCD vul el gudagnar, per l'emprima giada dapi il 2011, il turnier.

La Cuppa Spengler ha tutgà tar l'uffanza da Christian Wohlwend. Tranter Nadal e Bumaun gieva la televisiun quasi adina en la stiva dals Wohlwends. El haja charezzà da guardar il turnier sco uffant. Perquai sa legra el uss immens da dastgar esser sez da la partida a la Cuppa Spengler.

Ma esser da la partida na tanscha dentant betg al trenader da 42 onns. I saja uras ch'il HCD gudogna puspè ina giada la Cuppa Spengler. L'ultima giada ch'il buccal è restà a Tavau è stà il 2011 suenter ina victoria en il final cunter Dinamo Riga.

Quant gronda è la schanza ch'i tanscha per il titel?

Tenor Christian Wohlwend èsi grev da valitar quant ferms ch'ils adversaris vegnan, ad esser. Il Team Canada u las equipas da la Russia sajan adina fermas. L'equipa da Turku saja bain a la cua da la tabella en Finlanda, quai na saja dentant betg adina relevant. Quai mussia era l'exempel da Kalpa Kuopio che ha gudagnà la Cuppa Spengler avant in onn, malgrà che l'equipa aveva problems en il campiunadi indigen.

I dependa quant fitg che nus vulain quai.
Autur: Christian Wohlwend trenader dal HCD

La fin finala saja impurtant da guardar sin sasez, di Christian Wohlwend. Sch'els giajan en mintga gieu cun la dretga tenuta, hajan els segir bunas schanzas dad esser en il final da Silvester e da gudagnar quest final.

RTR actualitad 17:00

Artitgels legids il pli savens