Siglir tar il cuntegn

Header

cuntegn

Cuppa Spengler Pitra terrada cunter il Team Canada

Suenter la terrada cunter Trinec, perda Tavau er cunter il Team Canada. Tar il 1:5 cunter il favurit dal turnier ha il HCD dentant schanegià plirs giugaders da tschep.

Il Team Canada ha fatg cler en las emprimas minutas tgi ch’è schef sin il glatsch. En la terza minuta ha Andrew MacDonald tutgà al 1:0. Mo ina minuta pli tard ha Canada augmentà sin 2:0. Suenter quest gol è Tavau vegnì meglier en il gieu fin la fin da l’emprim terz. Per gols n’hai dentant betg tanschì.

En il segund terz ha il Team Canada auzà anc ina giada la cadenza ed entras gols da Eric Fehr, Kevin Clark ed Alex Grant è il gieu vegnì decidì.

En l’ultim terz è gartegià a Luca Hischier en il powerplay il 1:5 ord vista dals Grischuns. Tensiun n’hai dentant betg dà pli.

Il HCD frunta dumengia suentermezdi en il quartfinal sin ils Finlandais da TPS Turku. Perda Tavau er quest gieu è la Cuppa Spengler 2019 a fin. Gudogna l’equipa da Christian Wohlwend percunter, spetga ils 30-12 il mezfinal, puspè cunter il Team Canada.

Avant il gieu

Per il segund gieu da gruppa schanegia Tavau gist ina pluna giugaders. Otso Rantakari è il sulet giugader ester che vegn en acziun cunter il Team Canada. Uschia èsi cler ch'il trenader Christian Wohlwend metta gia il focus sin il quartfinal da damaun. Il HCD stuess numnadamain gudagnar cun 4:0 cunter il Team Canada per far il pass direct en il mezfinal. Sch'ins guarda sin la furmaziun na crai el dentant betg propi en in tal resultat.

RTR novitads 20:00

Artitgels legids il pli savens