Ella sa retiria suenter 160'000 craps, ha annunzià la curlista da Flem, Binia Feltscher, la mesemna via Twitter. Durant 14 onns ha la sportista da 41 onns fatg part da la squadra da dunnas dal Club da curling da Flem.
Duas giadas campiunessa mundiala
Il pli grond success ha Binia Feltscher pudì festivar als campiunadis mundials dal 2014 a Saint John en il Canada. Lura ès ella daventada per l'emprima giada campiunessa mundiala, quai sco skip. Dus onns pli tard a Swift Current, medemamain en il Canada, ès ella danovamain turnada a chasa sco campiunessa mundiala da curling.
In emprim grond success ha Binia Feltscher festivà il 2006 cun gudagnà argient als gieus olimpics a Turin cun il team dal skip Mirjam Ott.
Carriera plain success
Binia Feltscher ha cumenzà il 1989 a giugar curling. Blers onns ha ella giugà sco «Third» en il Team da Mirjam Ott. Cun quest'equipa ha ella tranter auter gudagnà argient als campiunadis d'Europa il 2004, il 2005 ed il 2009. Vitiers hai anc dà ina medaglia da bronz als campiunadis d'Europa il 2006 a Basilea avant ils fans da chasa. A partir dal 2007 ha Binia Feltscher furmà sco skip ses agen team. Sper ils dus titels da campiunessa mundiala ha ella er triumfà il 2014 al campiunadi d'Europa a Champéry, ses davos grond success.
RTR novitads 15:00