La regiun da Flem e Laax beneventa il 2023 ils megliers da la cursa d'orientaziun. Suenter il 1981, 2003 e 2012 han lieu ils campiunadis mundials da la cursa d'orientaziun per la quarta giada en Svizra. Quai ha decidì la suprastanza da la La Federaziun internaziunala da cursa d'orientaziun en ina sesida durant ils campiunadis mundials ch'han actualmain lieu en la Norvegia. La federaziun ha latiers cumpareglià las duas candidaturas da la Svizra e la Finlanda ed ha dà la preferientscha a Flem Laax.
Campiunadis mundials da guaud
Ils campiunadis mundials 2023 da cursa d'orientaziun vegnan ad esser campiunadis en il guaud. Ils atlets absolveschan las disciplinas distanza media, distanza lunga sco era staffetta. Il format da campiunadis mundials da guaud vegn quels dis per l'emprima giada manà tras en la Norvegia. Ils proxims onns datti alternant cun campiunadis mundials da sprint, mintga dus onns campiunadis mundials da guaud da cursa d'orientaziun.
Ils campiunadis mundials duain avair lieu il fanadur 2023 cun il punct central a Laax-Murschetg. Parellel als campiunadis planiseschan ils organisaturs ina cursa d'orientaziun da plirs dis per sportists dal temp liber.
RR novitads 11:00