Er las ultimas trais cursas da skis da questa stagiun tar las dunnas vegnian stritgadas. Quai suenter ch'il final da la stagiun a Cortina d'Ampezzo è vegnì stritgà.
Brignone gudogna il classament general
En consequenza gudogna la skiunza taliana Federica Brignone per l'emprima giada en sia carriera il classament general da la cuppa mundiala. La skiunza da 29 onns ha 153 puncts avantatg sin l'Americana Mikaela Shiffrin, ch'aveva anc la mesemna annunzià da dar ses comeback en la Svezia.
Shiffrin aveva gudagnà las ultimas trais stagiuns la culla gronda tar las dunnas. Il davos temp aveva Shiffrin dentant decis da desister sin cursas da skis. Quai en consequenza al mortori da ses bab.
Cullas pitschnas per Brignone e Vlhova
Plinavant ha Brignone gudagnà la culla pitschna en il slalom gigant. En il slalom ed il slalom parallel gudogna la Slovaca Petra Vlhova il classament. Tar las duas disciplinas da speed, pia super-g e cursa rapida, ha Corinne Suter mintgamai gudagnà la culla pitschna.
