Cumenzà ha Dario Caduff cun il ballape. Entras buns amis ha el lura fufragnà en il sport da hockey. Quai ha plaschì ad el uschè bain ch’el è sa decidì per il glatsch enstagl per il pastg. Suenter pliras staziuns en il Grischun (EHC Flem, HC Purtenza-Signuradi, EHC Cuira) è Dario ì en la Bassa tar ils Rapperswil-Jona Lakers, e quai en la vegliadetgna da mo 15 onns.
Igl è schon stà spezial da bandunar il da chasa uschè baud. Mo l’emprim mument èsi stà grond'euforia e plaschair sin quai che spetga. Il laschar encrescher è vegnì pli tard.
L’emprim intent era dad ir a Tavau al gimnasi da sport, di Dario Caduff. Damai ch’il HCD aveva dentant gia engaschà trais golis da la medema annada è il giuven Sursilvan sa decidì per ils Lakers per uschia avair meglras schanzas dad er pudair giugar campiunadi e sa sviluppar vinavant.
Da Rapperswil a Bülach
A l’entschatta da la stagiun ha Dario Caduff midà dals Lakers en il chantun Turitg tar il EHC Bülach. Tar il club da l’emprima liga ha il goli da 21 onns suttascrit in contract dad in onn, pia fin la fin da la stagiun 2015/2016. Il club da Bülach è enconuschent per buns golis. Tranter auter han Marco Bührer e Ronnie Rüeger giugà pli baud a Bülach. Reto Pavoni e Reto Berra, che dattan actualmain en la NHL, èn schizunt da Bülach.
Pli gugent far in pass enavos persuenter astgar giugar.
Dario Caduff lavura ed abitescha era a Bülach. I saja schon grev da lavurar ed anc giugar hockey sin quest livel, mo sch’ins giavischi da daventar profi da hockey lura fetschian ins gugent quai, manegia Caduff. La gronda finamira dal giuven Sursilvan è ussa da far pass per pass enavant ed in di giugar en la liga naziunala tar in club da num e pum.
Ina decisiun spontana
Che Dario Caduff è insumma daventà goli è stà ina decisiun spontana. Il Club da Hockey da Flem, nua che Dario Caduff ha giugà a l’entschatta, era sin la tschertga d’in goli a la fin da la stagiun. Cura ch’il trenader haja dumandà tgi che vessi gust dad ir en il gol haja el tegnì si il det, quai dentant plitost ord spass, di Dario Caduff. Davent da lura è el en il gol, e quai cun corp ed olma.
Durant ses temp dals Rapperswil-Jona Lakers ha il giuven da 21 onns schizunt dastgà giugar ina gia en la liga naziunala A. Plinavant ha Dario Caduff er giugà pliras giadas per diversas equipas naziunalas svizras dals juniors.