Cologna aveva gia gudagnà il di avant il titel campiun svizzer en il sprint. Per il meglier passlunghist svizzer da tut il temp è quai gia il 17avel titel naziunal en sia carriera.
Gudagnà il titel ha Cologna davant Roman Furger, il victur dal maraton engiadinais e Jonas Baumann ch'è vegnì terz.
Stagiun perfetga
Cunquai va a fin ina grondiusa stagiun per Dario Cologna. Suenter avair gudagnà per la quarta giada il Tour de Ski, ha el gudagnà als gieus olimpics a Pyeongchang sia quarta medaglia dad aur, quai en la cursa da 15 kilometers stil liber.
Plinavant ha el er triumfà per l’emprima giada en ils 50 kilometers dal Holmenkollen ad Oslo en Norvegia, ina da las pli impurtantas cursas insumma en la cuppa mundiala. Betg il davos ha el era pudì retschaiver sia quarta culla da cristal per il meglier passlunghist en las cursas da distanza.
Von Siebenthal gudogna cursa sur 30 kilometers
La cursa roiala da las dunnas als campiunadis svizzers a Steg ha gudagnà Nathalie von Siebenthal. Per la giuvna passlungista da 24 onns èsi il quart titel naziunal. Von Siebenthal ha gudagnà ils 30 kilometers en stil liber avant Nadine Fähndrich e Stefanie Arnold.
RR Sportissimo 17:00