David Poisson è mort

Il skiunz franzos è cupitgà durant in trenament en il Canada.

Purtret da David Poisson. Bild in Lightbox öffnen.

Legenda da maletgs: Poisson è mort cun be 35 onns durant in trenament a Canada. Keystone

Ina novitad da schoc per il sport da skis franzos: David Poisson è mort durant in trenament da skis a Canada. Quai ha communitgà la federaziun franzosa da skis.

Detagls da l'accident n'èn anc betg enconuschents. La disgrazia saja capitada en il territori da skis da Nakiska en la provinza d'Alberta. L'um da 35 onns era vid sa preparar sin las cursas da la cuppa mundiala en l'America dal nord.

Success constant ha mancà

Il spezialist da las disciplinas spertas aveva gudagnà il 2013 a Schladming la medaglia da bronz en la cursa rapida. Propa success constant n'ha Poisson, che deriva da la regiun Annecy datiers dal cunfin Svizzer, dentant mai gì. En la cuppa mundiala ha el dumagnà be ina giada sin il podest. Fin december 2015 ha el fatg il terz plaz a Santa Caterina. In mais avant ses success a Schladming ha el mancantà il podest a Kitzbühel be per pauc.

Era Swiss-Ski condolescha

En ina communicaziun a las medias da la federaziun franzosa è il president, Michel Vion s'exprimì schoccà: «Terrà da questa nova. Nus faschain part a la dolur da ses confamigliars en quest mument grev.» Era Swiss-Ski è s'exprimì davart l'eveniment tragic: «Noss patratgs èn tar la famigliar e tar il team da la Frantscha», uschia la federaziun svizra sin Twitter.

Il team da cursa rapida svizzer trenava il medem mument er sin la medema pista en il Canada nua che l'accident mortal dal skiunz franzos David Poisson è capità. Uschia hajan ils skiunz svizzers Beat Feuz, Patrick Küng, Mauro Caviezel, Marc Gisin e Gilles Roulin stuì persequitar l'accident ed il salvament da Poisson ord la vischinanza quai scriva Swiss Ski. Uss vegnan ils skiunz tgirads da persunas professiunalas da la Svizra ch’èn viagiads en il Canada.

Il quart franzos che mora sin pista

Poisson è il quart skiunz franzos dal temp suenter la guerra che mora sin la pista. 1970 ha Michel Bonzon rut la totona en la cursa rapida da Megève. Michel Dujon è collidà 1975 a Val d'Isère cun ina pitga. 2001 ha Cavagnoud pers la vita.

Poisson è stà bab d'in figl dad in onn e mez. Ses agen bab è mort be avant 15 dis.

RR novitads 06:00