Siglir tar il cuntegn

Header

Ina skiunza sin pista sur il Lai da Silvaplauna.
Legenda: Era a San Murezzan vegnan las skiunzas a val senza retschas d'aspectaturs a l'ur da la pista. Keystone
cuntegn

Decisiun en vista a corona Nagins aspectaturs tar cursas svizras da la cuppa mundiala

  • Tut las cursas da la cuppa mundiala ski alpin en Svizra han lieu da principi senza aspectaturs.
  • Quai ha Swiss-Ski decidì il venderdi ensemen cun ils organisaturs da las cursas.
  • En il rom da las cursas na vegni betg a dar tribunas per aspectaturs, areals per ils fans u tendas da festa.
  • Era pertutgà da la decisiun è l'occurrenza da siglir cun skis da la cuppa mundiala ad Engelberg.

Suenter «avair analisà da rudent» ha Swiss-Ski decidì quest pass drastic il venderdi. Las cursas duain avair lieu malgrà las circumstanzas difficilas. Il medem mument saja dentant da procurar ch'ils ristgs da sanadad per ils involvids sajan minimals, scriva la federaziun en in communitgà.

Naginas tribunas

Uschia vegnan las cursas a San Murezzan, Lai, Adelboden, Wengen e Crans-Montana, sco era il siglir cun skis ad Engelberg - ad avair lieu senza aspectaturs. Era las ceremonias cun ils victurs e da reparter ils numers da partenza scrodan.

Plinavant scriva Swiss-Ski, ch'ils concepts quai che pertutga ils aspectaturs pudess sa midar tut tenor il svilup da la pandemia en Svizra.

video
Las retschas d'aspectaturs mancan quest enviern tar las cursas
Or da Sport-Clip dals 16.10.2020.
laschar ir

Cas da corona a Sölden

Gist in di avant che la stagiun da la cuppa mundiala cumenza a Sölden en l'Austria, datti l'emprim cas da corona. Pertutgà è in dals trenaders da la squadra svedaisa dals umens. L'um saja vegnì testà positiv a Sölden e sa chattia en quarantina, ha communitgà la federaziun da skis svedaisa.

La nova stagiun da skis da la cuppa mundiala cumenza tradiziunalmain a Sölden. Damaun sonda è previs il slalom gigant da las dunnas, e la dumengia quel dals umens.

RTR novitads 11:00

Artitgels legids il pli savens

Scrollar a sanestra Scrollar a dretga