Siglir tar il cuntegn

Header

Navigaziun

Nino Schurter e Lars Forster
Legenda: Nino Schurter e Lars Forster han pers bler temp en la quarta etappa dal Cape Epic. mad
cuntegn

Naziunal/Internaziunal Defect fraina Schurter al Cape Epic

Suenter che Nino Schurter e Lars Forster han gudagnà il prolog e las emprimas duas etappas dal Cape Epic en l’Africa dal Sid èn els vegnids franads en la quarta etappa.

Tar ina descensiun ha Lars Forster gì plat la roda davos. Schurter e Forster han pers pervia da quest defect radund nov minutas sin la testa. La secunda equipa da Scott cun Andri Frischknecht e Gert Heyns è sa gidada cun ils favurits ed ha emprestà ina roda. Grazia a l’agid dal duo Frischknecht/Heyns han Schurter e Forster la finala terminà la quarta etappa dal Cape Epic sin il quart plaz cun in retard da bunamain set minutas sin il Brasilian Henrique Avancini che parta ensemen cun il Tudest Manuel Fumic.

Schurter e Forster betg pli ils leaders

Pervia da quest defect tar il team Scott-SRAM MTB-Racing han Nino Schurter e Lars Forster er stuì laschar passar il duo Avancini e Fumic en il classament general. Il Brasilian ed il Tudestg èn suenter la terza da set etappas ils novs leaders al Cape Epic 2019. Schurter e Forster èn da nov sin il segund plaz cun in retard da 2:24 minutas.

La quarta etappa dal Cape Epic da gievgia è sulet 43 kilometers lunga cun ina differenza d’autezza da 1’000 meters. A fin va il Cape Epic che vala sco la pli dira cursa da mountainbike insumma la dumengia a Paarl betg lunsch davent da Kapstadt.

RR novitads 17:00