Siglir tar il cuntegn

Header

cuntegn

Naziunal/Internaziunal Defensur da titel Wawrinka en runda 3

Al Roland Garros cuntanscha Stan Wawrinka ils 16avels finals. Il Romand ha battì en la segunda runda il Giapunais Taro Daniel cun 7:6, 6:3 e 6:4. Main bun vesa quai or per Viktorija Golubic: Ella perda cunter sia contrahenta Tscheca Lucie Safarova cun 2:6 e 2:6.

Stan Wawrinka stat en la terza runda dal French Open. Il defensur dal titel ha battì en la segunda runda il Giapunais Taro Daniel cun 7:6, 6:3 e 6:4. Cunter Lukas Rosol aveva Wawrinka (ATP 4) anc duvrà tschintg sets en l’emprima runda. Questa giada han tanschì trais cunter Danial (ATP 93). Ins na po dentant betg gist discurrer d’ina victoria lucca.

Taro Daniel è sta in adversari capabel e per lung temp stà a pèr cun Wawrinka. En l’emprim percurs aveva il Giapunais en il tiebreak schizunt duas ballas da set. Quellas n’ha el però betg pudì nizzegiar. En la proxima runda frunta Wawrinka sin il Franzos Jérémy Chardy.

Viktorija Golubic.
Legenda: Plain tensiun, tuttina senza schanza. Viktorija Golubic. Keystone

Golubic sto dar adina als French Open

A fin è il turnier dentant per la Turitgaisa Viktorija Golubic. En la segunda runda ha la Svizra pers cunter la finalista d'avant in onn, la Tscheca Lucie Safarova cun 2:6 e 2:6.

Il numer 13 da mund è stada in’entira mesira memia gronda per Golubic. Safarova ha giugà in tennis segir e plain pressiun, uschia che la Svizra era permanentamain sut squitsch. Golubic (WTA 130) ha bain pudì accentuar ch’ella saja capabla, ma è a la fin tuttina restada senza schanza.

RR novitads 15:00

Artitgels legids il pli savens