Ils emprims duels tranter Basilea e Maccabi Tel Aviv hai dà l’avust 2013 en il rom da la terza runda da qualificaziun per la Champions League. Ordaifer ha Basilea giugà pari 3:3, quai suenter ch’igl FCB manava gia suenter bun mes’ura cun 3:0. Grazia al 1:0 avant ils fans da chasa ha Basilea tuttina pudì sa qualifitgar per la proxima runda.
La fin favrer èn quellas duas equipas s’inscuntradas en ils 16vels-finals da l’Europa League. En l’Israel hai dà in pari da 0:0. A chasa ha Basilea lura fatg tut cler cun ina victoria da 3:0. Lura era Paulo Sousa il trenader da Maccabi. Trais mais pli tard è el daventà trenader a Basilea ed uschia successur da Murat Yakin.
Nova situaziun da partenza
Dapi il davos inscunter hai dà bleras midadas tar omaduas equipas. Tar il FC Basilea figureschan cun Philipp Degen, Behrang Safari, Mohamed Elneny, Taulant Xhaka, Matias Delgado ed il goli da reserva Mirko Salvi sulet anc 6 giugaders ch’eran er stads da la partida avant dus onns a Tel Aviv. Sumegliant er la fluctuaziun da cader tar Maccabi.