Derby turitgais en il quartfinal da la cuppa svizra

En il quartfinal da la cuppa svizra da ballape vegni questa saira a Turitg tar il derby tranter il FCZ ed ils Grasshoppers. Il FCZ è en la Super League sin il terz plaz ed uschia classà tschintg plazs meglier che GC che cumbatta encunter la relegaziun.

Gilles Yapi dal FCZ (dretg) e Munds Dabbur da GC (sanester) Bild in Lightbox öffnen.

Legenda da maletgs: Tgi sto gratular a l’auter suenter il derby turitgais en il quartfinal da la cuppa svizra, Gilles Yapi dal FCZ (dretg... Keystone

Plinavant ha il FCZ gudagnà en questa stagiun tut ils trais duels cun GC. En la cuppa Svizra spetga il FC Turitg dentant gia dapi 46 onns sin in success encunter il grond rival GC. Oravant tut la terrada da 5:6 suenter prolungaziun il 2004 n’è anc betg emblidada tar il FCZ.

Il segund duel da la Super League en il quartfinal da la cuppa svizra dat Sion encunter Aarau. Durant che la furma tar ils Vallesans mussa ensi, mussa quella dal FC Aarau engiu. La davosa victoria ha Aarau festivà ils 5 d’october 2014.

FC Basilea – Münsingen per la terza

Tranter ils megliers otg en la cuppa svizra figureschan anc dus clubs en ligas pli bassas, Buochs ord la segunda liga e Münsingen ord l’emprima liga. Per la terza giada ils davos 18 onns frunta Münsingen sin il grond favurit, il FC Basilea. Omadus duels enfin oz ha il FCB gudagnà, quai dentant mintgamai fitg stretg, ina gia cun 3:1 suenter prolungaziun e la davosa gia cun 1:0.

Buochs – Sogn Gagl spustà

Il davos gieu da quartfinal da la cuppa svizra tranter Buochs e il FC Son Gagl è perencunter vegnì spustà. Suenter las plievgias dals davos dis n'èsi betg pussaivel da giugar questa saira sin la plazza da ballape da Seefeld. Il gieu duai vegnir giugà mesemna proxima, ils 11 da mars 2015. Da tge uras n’è anc betg enconuschent.

RR novitads 10:00