Schurter ha survegnì il premi a chaschun d’ina saira da gala a Turitg. L’elecziun è vegnida fatga mez e mez cun las vuschs da schurnalists da sport e cun ils resultats d’in «online-voting». Suenter ils onns 2012 e 2013 èsi gia la terza giada che Nino Schurter da Tersnaus ha gudagnà il Swiss Cycling Award. Victura da las dunnas è la campiunessa d’Europa da mountainbike Jolanda Neff.
Sper Nino Schurter ch’è oriund da Tersnaus en Lumnezia è anc in segund ciclist dal medem vitg vegnì onurà: Vital Albin è vegnì onurà per il titel da campiun d’Europa cun l’equipa da mountainbike.
Il campiun olimpic en la cursa encunter l’ura Fabian Cancellara ch’è sa retratg da curt è vegnì undrà per sia gronda carriera.
RR novitads 23:00