Novak Djokovic encunter Andy Murray, aschia senumna il final al turnier da tennis a Miami. Djokovic ch'ha gudagnà gia 4 giadas il turnier a Key Biscaine ha battì el mezfinal l'American John Isner en 2 sets (7:6 / 6:2). Avant aveva il Scot Andy Murray battì en ses miezfinal il Tschech Tomas Berdych medemamain en 2 sets (6:4 / 6:4).
Djokovic cler favurit per il final
En il duel da final vala il Serb Novak Djokovic sco favurit. La numera 1 dal mund ha gudagnà ils ultims 6 duels cunter Murray. L'ultima giada en il final da l'Australian Open ed il mezfinal ad Indian Wells.
Gudogna Djokovic quest final, lura fiss el l'emprim giugadur insumma che dumagnass per la terza giada il «double» (gudagnar il medem onn ad Indian Wells e Miami).
Partizipaziun svizra tar final da las dunnas
En il final a Miami è era ina Svizra. En il turnier da dubel cumbattan Martina Hingis ensemen cun Sania Mirza da l'India per il titel. Quest nov duo dat il final encunter il duo da la Russia cun Jekaterina Makarowa e Jelena Wesnina.
En il final da las dunnas solo vegn quai tar il duel tranter l'Americana Serena Williams e la Spagnola Carla Suarez Navarro.
RR novitads 12:00