Siglir tar il cuntegn
Inhalt

Naziunal/Internaziunal Dominique Gisin sa retira dal sport da skis

A l’ur dal final da la cuppa mundiala da skis a Méribel è la campiunessa olimpica Dominique Gisin sco spetgà sa retratga dal sport da skis.

Dominique Gisin en l'arrivada a Méribel.
Legenda: Dominique Gisin – ina gronda persunalitad di adia al sport da skis. Keystone

Ella n’haja pudì metter naginas finamiras pli en quest sport e saja vegnida als cunfins, uschia la skiunza d’Engelberg. Ussa saja il dretg mument per dir adia al circus da skis e la cuppa mundiala.

Sia carriera, ina carriera cun bleras grevas blessuras, ha Dominique Gisin numnà sco in viadi tut spezial. Sper il titel da campiunessa olimpica en la cursa rapida avant in onn a Sotschi ha Dominique Gisin anc gudagnà trais cursas da la cuppa mundiala.

Ina gronda persunalitad di adia

Cun Dominique Gisin perda Swiss Ski ina figura da leader ed ina gronda campiunessa. La skiunza da 29 onns, ina spezialista en las disciplinas spertas, ha adina chattà ina via enavos, er suenter grondas e grevas terradas e blessuras.

Er Didier Défago prenda cumià

Sper Dominique Gisin ha er Didier Défago dà adia al circus da skis. Il skiunz vallesan da 37 onns da Morgins aveva gia annunzià avant in onn ch’el terminescha sia carriera suenter la stagiun 2014/2015.

Didier Défago prenda cumià dals fans en l'arrivada a Méribel.
Legenda: Didier Défago prenda cumià dals fans en l'arrivada a Méribel. Keystone

Vancouver, Wengen e Kitzbühel

Il punct culminant da la carriera ha Didier Défago festivà als gieus olimpics da Vancouver il 2010. Là è Défago vegnì campiun olimpic en la cursa rapida, la cursa roiala. Per lingias grassas aveva il Vallesan dentant gia procurà in onn avant. Il schaner 2009 ha Didier Défago gudagnà entaifer in’emna ils dus classichers, las duas cursas rapidas al Lauberhorn e sin la Streif a Kitzbühel.

El vegnia a persequitar vinavant e sustegnair vinavant il sport da skis, uschia Didier Défago avant la medias a Méribel.

RR novitads 17:00