Siglir tar il cuntegn
cuntegn

Naziunal/Internaziunal Duel brisant tranter Svizra e Serbia

Il segund gieu da gruppa tranter la Svizra e la Serbia pudess esser in gieu decisiv sin via en l'otgavelfinal. L’equipa che gudogna quest duel a Kaliningrad è sin fitg buna via da cuntanscher la fasa da K.o.

Vladimir Petkovic e ses giugaders tar in trenament a Kaliningrad.
Legenda: La squadra naziunala enturn Vladimir Petkovic è pronta per il gieu cunter la Serbia. Keystone

La Svizra ha cumenzà cun success ils campiunadis mundials suenter in pari cunter il grond favurit la Brasilia. Mo era ils Serbs han gì success en l’emprim gieu da gruppa. Suenter il 1:0 encunter la Costa Rica è la Serbia schizunt a la testa da la tabella.

I vegn spetgà in dir cumbat sur 90 minutas, detagls pudessan decider, malgrà che la Svizra ha dapli qualitad e vala sco favurit en quest gieu. Damai che la Svizra ha er en ses cader plirs giugaders cun ragischs en l’Albania u en il Cosovo vegn era spetgà in duel brisant. Las relaziuns tranter quests pajais è enconuschentamain betg la meglra.

Il gieu Svizra – Serbia cumenza a las 20:00 uras. Andreas Wieland rapporta per il Radio Rumantsch live da Kaliningrad, quai a partir da las 19:00 uras.

RR actualitad 07:00