Siglir tar il cuntegn

Header

cuntegn

Duel tranter Federer e Nadal In ulteriur gieu per l'istorgia?

Igl è il duel tranter duas legendas dal sport da tennis: Federer che ha gudagnà 20 titels da Grand Slam cunter Nadal, che ha gudagnà 18 titels da Grand Slam. En il mezfinal da Wimbledon dastg'ins spetgar ina ulteriura battaglia tranter las duas legendas.

En ils duels directs maina Rafael Nadal cun 24:15. 14 da questas victorias ha il Spagnol dentant gudagnà sin sia surfatscha preferida - sin sablun. Sin pastg hai pir dà 3 giadas il duel tranter Federer e Nadal. Il 2006 e 2007 ha Federer triumfà en il final da Wimbledon, il 2008 ha Nadal pudì batter il Svizzer en in gieu che ha bunamain cuzzà 5 uras (6:4, 6:4, 6:7, 6:7, 9:7).

La rivalitad en il sport da tennis

En il tennis na datti nagina autra rivalitad che ha ina tala istorgia sco questa tranter Nadal e Federer. Il 2004 hai dà l'emprim duel tranter els e dapi lura hai dà numerusas battaglias legendaras tranter il Svizzer ed il Spagnol. Legendaras èn anc adina il final da Wimbledon 2008, nua che Nadal ha gudagnà, u il final a l'Australian Open 2017, nua che Federer ha gudagnà. Ensemen cun Novak Djokovic han els dominà il sport da tennis durant l'ultim decenni.

Mezfinals a Wimbledon

Sco emprim dattan a las 14.00 Novak Djokovic e Roberto Bautista Agut lur mezfinal a Wimbledon. Il gieul tranter Roger Federer e Rafael Nadal cumenza suenter quest gieu, probabel enturn las 16.30.

RR actualitad 11:00