Siglir tar il cuntegn

Header

Ian Spescha dat gugent e-sports
Legenda: Ian Spescha dat gugent e-sports. MAD, Ian Spescha
cuntegn

Durant la pandemia Il sport stat airi, dentant betg ils e-sports

E-sports è il surnum per tut las variantas da dar gieus sin ina consola. Dal gieu da ballape «FIFA20» fin al gieu da strategia «League of Legends» è tut e-sports.

Pervia dal coronavirus na datti per il mument naginas occurrenzas da sport. Il campiunadi da ballape en plirs pajais da l’entira Europa, dentant era quels en auters sports sco per exempel en la National Hockey League èn vegnids spustads. Il campiunadi svizzer dad American Football cun il defensur dal titel, ils Calanda Broncos, è vegni stritgà davent da l’entschatta. Entant ch'il sport ordinari stat airi, vegn dà davent da chasa e-sports, gieus digitals sin la consola.

«FIFA20» fin «League of Legends»

Gieus digitals sportivs sco «FIFA20» cun campiunadis e turniers sco la «Champions League» ed er il gieu da strategia «League of legends» èn tut e-sports. Gieus ch'ins po dar persul encunter il computer u er en equipas da tschintg giugaders encunter in’autra equipa.

Ian Spescha da Breil è in giugader passiunà. Mintga segund di investescha el circa quatter uras per dar ses gieus preferids, dentant era per analisar singulas acziuns.

Fascinaziun per ils gieus da pitschen ensi

Tar Ian Spescha ha tut cumenzà cun gieus da Nintendo. Gia sco buob ha el dà sin il «Game Boy». Pli tard alura èn vegnids vitiers gieus da computer sin la consola. Dapi passa diesch onns dat Ian Spescha gieus dad e-sports. Ils gieus preferids sa numnan «League of legends», in gieu da strategia, e «Counter Strike» in gieu da sajettar. «League of legends» datti dapi passa diesch onns ed è in dals gieus ils pli populars. L’onn 2016 devan 100 milliuns giugaders il gieu mintga mais.

RTR Sportissimo 17:00