Siglir tar il cuntegn

Header

Matteo Badilatti a chasa a Poschiavo
Legenda: Matteo Badilatti a chasa a Poschiavo RTR, Roman Dobler
cuntegn

Durant la pandemia «The Digital Swiss 5» è almain in zichel sco ina cursa da velo

Matteo Badilatti da Poschiavo sa participescha a la cursa da velo digitala «The Digital Swiss 5».

La cursa digitala, «The Digital Swiss 5», è ina premiera. Per l’emprima giada sesan radund 60 ciclists da professiun a chasa sin il velo ch'è fixà sin ina rolla digitala e pedaleschan las differentas etappas da la cursa al lieu. Las datas da mintga singula rolla digitala vegnan visualisadas sin in visur. Uschia han aspectaturs e ciclists almain in zichel l’impressiun dad ina cursa da velo.

Test per autras cursas

Ils organisaturs da la cursa tras la Svizra, il Tour de Suisse, han reagì il pli spert. Suenter che la Confederaziun ensemen cun ils chantuns avevan decis il lockdown mez mars èn els ids a la tschertga dad in'alternativa. Ensemen cun ina firma da computers ha il Tour de Suisse lantschà la cursa digitala «The Digital Swiss 5». La cursa passa ils trajects ch'il Tour de Suisse ordinari avess era passà, ed uschia è la cursa digitala almain in zichel sco ina dretga cursa da velo.

Badilatti en sia segunda stagiun sco profi

Il ciclist grischun Matteo Badilatti da Poschiavo ha mess avant la nova stagiun tut auter ch'igl è per il mument. Gia il favrer è el sa participà a duas cursas da velo. L’emprim è el stà en Columbia per il Tour da la Columbia. Ina cursa cun totalmain sis etappas. E da là è la stagiun ida vinavant ad Antalya en Tirchia. Il Tour dad Antalya è ina cursa cun quatter etappas. Ina da quellas etappas ha Badilatti terminà sco segund. Il Grischun fiss pia sta pront per la nova stagiun. Uss è dentant tut auter e la cursa digitala è ina buna alternativa da trenar per ina finamira e per restar en furma er en temp da corona.

RTR Sportissimo 17:00