Siglir tar il cuntegn

Header

Tschintg giugaders da hockey: duas èn per terra e cumbattan per il puck.
Legenda: En la partida tranter il HCD e l'EV Zug n'èsi vegnì regalà nagut. Keystone
cuntegn

Naziunal/Internaziunal Emprima terrada da Tavau en ils playoffs

Pitra terrada per il Club da hockey da Tavau en l’emprim mezfinal dals playoffs. Tavau ha pers ordaifer encunter l’EV Zug cun 2:3 suenter prolungaziun. Jarkko Immonen ha sajettà en la 77avla minuta il gol da la victoria da Zug. Enzo Corvi era sin il banc da chasti.

audio
Bunura: Hockey: EVZ – HCD (emprim gieu mezfinal)
01:45 min, Actualitad dals 22.03.2017.
laschar ir. Durada: 01:45 minutas.

Zug manava gia suenter l’emprim terz cun 2:0. Omadus gols en crudads durant duas situaziuns da superiuradad numerica per ils da Zug. En il segund terz ha Tavau dentant mussà ina ferma reacziun e pudì egualisar. Ils gols per il HCD han fatg Dino Wieser e Mike Maskivuo.

Silsuenter han ils giasts gì dapli da la partida. La decisiun è dentant crudada pir curt avant la fin da la prolungaziun. Il gol decisiv per Zug ha fatg il Finlandais Jarkko Immonen en la 77avla minuta. La segunda partida è gievgia, ils 23 da mars a Tavau.

Terrada era per Berna

Igl SC Berna ha pers l’emprim gieu dal mezfinal dals playoffs da hockey. Il campiun svizzer ha pers a chasa encunter il vice-campiun Lugano cun 2:4. Lugano maina uschia la seria da mezfinal cun 1:0. La seria cuntinuescha gievgia a Lugano.

Ina clera victoria ha Friburg festivà en l’emprim gieu dal final dals playouts. Friburg ha battì Ambrì-Piotta cun 4:0.

Victoria da Partenz-Signuradi en la 2. liga

Partenz-Signuradi ha gudagnà l’emprim gieu dal final da la segunda liga ordaifer encunter Herisau cun 2:1 suenter prolungaziun.

RR novitads 23:00

Artitgels legids il pli savens

Scrollar a sanestra Scrollar a dretga