Quai saja gest bun, che Tavau dettia l’emprim gieu da la stagiun encunter Zug di Enzo Corvi. L'attatgader da Tavau ha numnadamain betg emblidà, ch’il HCD ha pers la stagiun vargada la seria da mezfinal encunter Zug cun 2:4. Uss haja il HCD la chaschun per ina revantscha.
L’emprova generala è malgartegiada
L’emprova generala dal HCD per l’emprim gieu dal campiunadi svizzer è propi betg gartegiada. Tavau ha pers en la Champions Hockey League gest trais gieus en seria. L’ultim schizunt encunter ils Cardiff Devils, exots dal hockey ord la Valisa, il Wales. Suenter quella blamascha sajan els dublamain concentrads per il gieu encunter Zug. Enzo Corvi parta perquai cun buna speranza en il nov campiunadi.
Il campiunadi svizzer saja il pli impurtant
Il Club da hockey da Tavau veglia far en tuttas concurrenzas ina buna figura manegia Enzo Corvi, tant en la Champions Hockey League sco er en la cuppa svizra ed en la cuppa Spengler. Ma il pli impurtant saja anc adina il campiunadi.
Esser anc meglier che la stagiun passada
Enzo Corvi è sin buna via da daventar in dals giugaders-clav dal HCD. La stagiun passada ha l’attatgader, ch’è oriund da Cuira, sajettà tants gols sco anc mai. Questa stagiun vul el mussar, che quai n'era betg stada ina casualitad
RR actualitad 17:30