Siglir tar il cuntegn

Naziunal/Internaziunal Etappa dal TdF va a fin en in caos

La 12avla etappa al Tour de France è ida a fin a moda dramatica. Curt avant l’arrivada sut il tetg dal Mont Ventoux è ina gruppa da trais favurits vegnida franada da motos e fans.

Chris Froome, il leader en il classament general, ha tar quest accident rut ses velo ed ha cumenzà a currer dal culm siadora enfin ch’il ciclist dal Team Sky ha survegnì in velo da reserva. Curt suenter la cursa ha la direcziun dal Tour de France reagì sin quest scandal e decis da valitar l’etappa fin al mument da quest accident, pia intgins tschients meters avant l’arrivada. Chris Froome resta uschia il leader dal Tour de France 2016.

Dus Beltgs a la testa

Gudagnà l’etappa da Montpellier direcziun Mont Ventoux ha il beltg Thomas de Gendt ch’era scappà gia baud ensemen da la gruppa principala. De Gendt ha triumfà cun in avantatg da 2 secundas sin ses cumpatriot Serge Pauwels. Terz cun in retard da 14 secundas è vegnì il Spagnol Daniel Navarro.

Il leader Chris Froome ha la finala cuntanschì l’arrivada sco 25avel cun in retard da 6.45 minutas. Ses gronds concurrents en il cumbat per il maillot jaune, tranter auter il Columbian Nairo Quintana, han pudì surpassar Chris Froome sin ils davos meters. Froome sez era vegnì da scappar da ses gronds rivals. Sulet l’Ollandais Bauke Mollema e l’Australian Richie Porte avevan pudì reagir.

Froome vinavant en il maillot jaune

Malgrà che Chris Froome vess pers il maillot jaune resta il Brit a la testa dal classament general, quai la decisiun da la direcziun dal TdF. Froome ha vinavant 47 secundas avantatg sin ses cumpatriot Adam Yates. Terz cun in retard da 56 secundas suonda Bauke Mollema. Il grond rival da Froome, il Columbian Nairo Quintana, è quart cun in retard da 1.01 minuta sin il Brit ch’ha gia gudagnà duas giadas il Tour de France. Meglier svizzer è Sébastien Reichenbach sco 18avel cun in retard da 8.02 minutas.

Pervia dal ferm vent è la cursa vers il Mont Ventoux vegnida scursanida. L’arrivada è da stada da nov 6 kilometers sut il culm al Chalet Reynard. La 13avla etappa da venderdi è ina cursa encunter l’ura sur 37,5 kilometers da Bourg-Saint-Andéol a La Caverne du Pont-d’Arc.

RR novitads 17:00