Il siemi da Basilea, da cuntanscher il mezfinal da l'Europaleague è a fin. A Gelsenkirchen en Germania ha il FCB pers il gieu da quartfinal cunter Schachtar Donezk da l'Ucraina cun 1:4.
Gia suenter 96 secundas ha Basilea survegnì l'emprim gol. Il sulet gol per Basilea ha sajettà Ricky van Wolfswinkel curt avant la fin.
Malgrà la terrada hajan ils ballapedists da Basilea dà adia da la Europa League cun il chau ad aut, ha il capitani Valentin Stocker ditg. Quest gieu haja mussà ad els nua ch’ils cunfins sajan. Tuttina possian els esser losch da tut il prestà.
En l'auter gieu da quartfinal han ils Wolverhampton Wanderers pers cunter Sevilla cun 0:1. Gia sa qualifitgads per il mezfinal èn Inter Milan e Manchester United.
