Siglir tar il cuntegn
cuntegn

Naziunal/Internaziunal F1: Lewis Hamilton gudogna a Silverstone

Il Brit ha gudagnà cun ses Mercedes il Grond Premi da la Gronda Britannia per la terza giada en seria. Max Verstappen e Nico Rosberg cumpletteschan il podest. Hamilton ha gudagnà per la 4 giada insumma questa cursa.

Cursa da F1.
Legenda: La cursa ha cumenzà davos il Safety-car per motivs da segirezza. Keystone

Atgnamain è il collega da squadra da Hamilton, Nico Rosberg, arrivà sco segund en l'arrivada. El n'ha dentant betg pudì sa legrar ditg da ses segund plaz, perquai ch'el ha survegnì in chasti da 10 secundas sin ses temp da cursa. Ils cumissaris da la cursa han sancziunà contacts sur func da Rosberg cun ses inschigners. En connex cun problems mecanics aveva el dumandà per cussegl sur func, ed uschia nizzegià tenor il reglament in agid scumandà.

Mercedes na fa tuttina nagin protest

Suenter ch'ils cumissaris han communitgà il chasti, aveva la squadra da Mercedes annunzià da vulair far protest cunter questa decisiun. Il glindesdi ha Mercedes dentant communitgà da vulair acceptar il verdict. Uschia perda Rosberg la plazza dus e vegn rangà davos Max Verstappen sin Red Bull sin plazza trais.

Classament general fitg stretg

Grazia a sia quarta victoria en questa stagiun è Lewis Hamilton be pli in punct davos Nico Rosberg en il classament general. Quai cun resguardar che Rosberg è vegnì rangà enavos sin plazza trais.

Sauber senza puncts

Nagins puncts n'hai er dà en la 10avla cursa per il team da Sauber. Il Brasilian Felipe Nasr è sa classà sco 15avel. Ses collega da squadra, il Svedais Marcus Ericsson, è crudà or cun problems tecnics. La sonda ha Ericsson anc gì in grev accident en il terz trenament liber.

RR novitads 16:00