Siglir tar il cuntegn
Inhalt

Naziunal/Internaziunal F1: Sauber è spendrà

La squadra da cursas da furmla 1 da Sauber è spendrada. Ina societad d’investment svizra ha surpiglià l’interpresa per 100%. Monisha Kaltenborn resta scheffa da d’equipa ed era il num da l'equipa resta vinavant Sauber.

Il team da Sauber po vinavant restar en la furmla 1.
Legenda: Il team da Sauber po vinavant restar en la furmla 1. Keystone

La societad d’investment svizra Longbow Finance SA surpiglia 100% da la Sauber Holding, tar la quala era la Motorsport SA tutga. La nova possessura surpiglia las participaziuns da Peter Sauber e da la scheffa d’equipa Monisha Kaltenborn. Il fundatur Sauber aveva anc dus terz da l’interpresa, l’Austriaca Kalternborn in terz.

Sauber sa retira, Kaltenborn resta

Dapli n’è betg vegnì enconuschent davart las formalitads da la surpigliada da Sauber. Cler è dentant gia ussa che Monisha Kaltenborn salva vinavant sias funcziuns en l’interpresa - vul dir: ella resta scheffa d’equipa e CEO ed è da nov era en il cussegl d’administraziun. Peter Sauber perencunter, l'um da 72 onns ch'era gia ina giada ì en pensiun, vegn ussa puspè a sa retrair da tut sias funcziuns aifer Sauber cunquai che «sia» firma para ussa d'esser spendrada.

RR novitads 15:00