Puspè ina giada han ils Canadais mussà cun tge luschezza ch'els portan l'ischi sin il pèz. En mintga gieu ha il topfavurit dominà l'adversari. Cun in hockey simpel ed effectiv han els fatg flucs cun tut las equipas. Cun 16 victorias da turnier è il Team Canada da nov campiun da record da la Cuppa Spengler.
Ambri – il segund victur
Sin il glatsch è il Team Canada stà ina classa pli ferms ch'il rest. Dentant quai che Ambri-Piotta ha mussà a la Cuppa Spengler merita grond respect. Sin il glatsch engaschi total e sper il glatsch fans che han procurà per in'atmosfera gigantica. Ina tala atmosfera, sco durant ils gieus d'Ambri, hai darar dà al turnier da tradiziun. Sco fan da hockey ston ins sperar ch'ils Tessinais survegnan er in'invitaziun per la Cuppa Spengler 2020.
HCD – il grond perdent
Il trenader Christian Wohlwend ha avant il turnier adina puspè fatg cler ch'el veglia gudagnar la Cuppa Spengler. Quai che Tavau ha la fin finala mussà è dentant stà fitg magher. Pers tut ils trais gieus e mo sajettà trais gols. Vitiers vegn ch'ils responsabels enturn Wohlwend ed il schef da sport, Raeto Raffainer han schanegià ina gronda part dals giugaders da tschep en il gieu da gruppa cunter il Team Canada.
Ord vista sportiva ina decisiun chapibla. Ina decisiun ch'è dentant vegnida pigliada si nausch da blers fans qua a la Cuppa Spengler. Ins paja bler per ils bigliets e sch'ins vesia lura mo in HCD cun la segunda garda saja quai dischillusiunant, han ins udì da fans.
Er ils Russ han trumpà
Puspè ina giada trumpà ha er l'equipa da la Russia. Salawat Youlaev Ufa ha sco il HCD pers tut ils trais gieus dal turnier. Gia l'onn passà aveva l'equipa russa da Magnitogorsk trumpà sin l'entira lingia. Sche las equipas da la KHL vegnan cun uschè pauc schlantsch a dar la Cuppa Spengler, ston ins far la dumonda sch'i fa anc senn d'engaschar equipas da la Russia.
Trinec – betg spectacular ma effectiv
L'equipa da Ocelari Trinec ha persvas cun far il pass en il final. Els n'han betg dà in hockey spectacular, dentant in effectiv. In buna parita ha, tut en tut, er il TPS Turku da la Finlanda fatg. Oravant tut sch'ins resguarda che quest'equipa è actualmain sin l'ultim plaz dal campiunadi finlandais.
Marc Gianola, president dal comité d'organisaziun da la Cuppa Spengler fa la suandanta bilantscha:
