FC Basilea stat en l'8avel final

Suenter ina partida dramatica cunter St-Etienne stat il club da ballape da Basilea en l’8avel final da l’Europa League.

Ils giugaders dal FCB sa legran da la victoria. Bild in Lightbox öffnen.

Legenda da maletgs: Levgiament: Ils Basilais decidan la partida cunter St-Etienne pir l'ultim mument. Keystone

Il campiun svizzer ha reagì en l'Europa League sin la terrada da 2:3 en il prim gieu tar St-Etienne. Il FCB vegn tar ina victoria a chasa da 2:1, dentant pir en l’ultim mument. St-Etienne ha egualisà en la 90avla minuta, ma en la prolungaziun ha Luca Zuffi segirà la victoria als Basilais en la 92avla minuta. Zuffi aveva gia sajettà il 1:0 suenter 15 minutas.

2 da 4 clubs tudestgs vinavant

Senza problems ha Borussia Dortmund cuntanschì ils 8avels finals. Il BVB gudogna suenter il 2:0 en l'emprim gieu cunter Porto era il segund gieu en il Portugal cun 1:0. Il goli portugais Casillas ha fatg en la 23avla minuta in autogol.

Medemamain sa qualifitgà per ils 8avels finals è Liverpool. Als "Reds" ha tanschì ina satigla victoria da 1:0 cunter Augsburg per vegnir ina runda enavant. Gia suenter 5 minutas ha Liverpool pudì sajettar in penalti. Bain ha il goli svizzer da Augsburg Marvin Hitz sminà il dretg chantun, dentant cunter il sajet precis da James Milner n'ha el gì nagina schanza.

Er ina runda vinavant è Bayer Leverkusen, quai grazia a la victoria a chasa da 3:1 cunter Sporting Lissabon. Betg pli da la partida è l'ulteriur club da la Bundesliga, Schalke 04. Ils Tudestgs han pers cleramain cunter Schachtar Donezk, quai a chasa cun 0:3.

RR novitads 23:00