FCB cun schlantsch vers Moscau

En il terz gieu da la Champions League frunta il FC Basilea questa saira (20:45 uras) ordaifer sin il ZSKA Moscau. Suenter la gala en il segund gieu cunter Benfica Lissabon (5:0) è il campiun svizzer partì cun schlantsch ed optimissem vers la chapitala russa.

Raphael Wicky. Bild in Lightbox öffnen.

Legenda da maletgs: Raphael Wicky, trenader FC Basilea. Keystone

Suenter ina partenza plitost disgraziada en la nova stagiun para il FCB d’avair chattà la via al success. Betg sulet il success cunter Benfica Lissabon, mabain er en il campiunadi svizzer ha Basilea fatg il davos temp ina buna figura.

Mintga punct quinta

Il duel cun ZSKA Moscau pudess er gist esser il cumbat per il segund plaz da gruppa. Davos il leader Manchester United ch’ha gudagnà ils dus emprims gieus da gruppa figureschan Basilea e Moscau mintgamai cun trais puncts. Per pudair sa qualifitgar per la fasa da K.o. da la Champions Leauge è il duel cun Moscau uschia da grond’impurtanza.

Durant ch’il ZSKA Moscau ha en lur retschas blers giugaders pli vegls cun gronda rutina ha Basilea actualmain in cader fitg giuven cun pauca experientscha sin plaun internaziunal. In recept da success pudess dentant esser la spertadad da plirs giugaders giuvens dal FCB. Sco encunter Lissabon vul Basilea uschia er agir cunter Moscau.

RR actualitad 17:00