Per ina persuna è quest mezfinal in duel tut spezial, per il trenader da Bayern München Pep Guardiola. En ses segund onn sco trenader dal campiun tudestg da record turna el per l’emprima giada enavos en sia patria, en il Camp Nou a Barcelona. Guardiola ha passentà var 20 onns tar Barça, quai sco giugader e pli tard sco trenader. Il Catalan ha sco trenader gudagnà tranter il 2008 ed il 2012 gist 14 titels cun Barcelona, tranter auter duas giadas la Champions League. Barcelona è l’equipa da cor da Pep Guardiola, sia equipa da chasa. Tuttina vul il trenader da 44 onns manar quest onn il FC Bayern München en il final da la Champions League ed uschia scriver in ulteriur chapitel da success.
«MSN» cun ina quota sensaziunala
Tenor la situaziun actuala vala il FC Barcelona sco il favurit en il mezfinal encunter Bayern München. Il grond trumf da l’equipa spagnola è il trio offensiv cun ils superstars Lionel Messi, Luis Suarez e Neymar. 108 da 159 gols en questa stagiun va sin il conto dals trais Sidamericans. Gronda classa ha dentant er l’equipa tudestga. Cun Manuel Neuer posseda Bayern in dals megliers golis dal mund. Plinavant figureschan plirs campiuns mundials en il cader da Minca, tranter auter Philipp Lahm, Bastian Schweinsteiger u Thomas Müller. En l’attatga procura oravant tut il polac Robert Lewandowski per gols.