Insacura ha la seria stuì ir a fin. Suenter 13 victorias en 13 finals da la cuppa svizra da ballape ha il FC Sion per l’emprima giada emprendì d’enconuscher il sentiment da perder. Ils Vallesans èn vegnids dominads dal campiun svizzer e n’han mai propi giu ina schanza da gudagnar il 14avel titel.
Clara chaussa suenter pausa
Ils gols èn tuts capitads en la segunda mesadad. Suenter in 0:0 da pausa ha Matias Delgado sajettà il 1:0 per Basilea cun in sajet ord 11 meters. In quart ura pli tard ha il defensur Adama Traore tuc al 2:0 ed uschia procurà per la decisiun. Silsuenter ha Basilea controllà il gieu fin la fin. En la 89avla minuta ha Michael Lang anc fatg tut cler cun ses 3:0.
Il trenader dal FC Basilea, Urs Fischer, banduna uschia il club cun gudagnar il «double». E Fischer ha dumagnà insatge che nagin aveva anc enfin ussa. El ha cun ses FCB terminà il mitus dal final da la cuppa svizzer da Sion.