Siglir tar il cuntegn

Header

cuntegn

Naziunal/Internaziunal Federer cunter dus qualificants

A l'Australian Open frunta il Svizzer l'emprim sin dus qualificants e lura probabel sin Tomas Berdych. En il quartfinal pudess dar il duel cunter il numer 1 dal mund, Andy Murray. In duell svizzer tranter Wawrinka e Federer pudessi dar en il mezfinal.

La sort ha manegià bain cun Federer. Suenter ch'el frunta en ils emprimas duas rundas sin dus qualificants na spetga en la terza runda betg Rafael Nadal, mabain Tomas Berdych. Cunter il Tschec ha Federer gudagnà ils ultims tschintg duels.

Sche Federer cuntanscha ils otgavels finals lur vegni dir: lura pudessi dar in suenter l'auter ils duels cunter Kei Nishikori (ATP 5), Andy Murray (ATP 1), Stan Wawrinka (ATP 4) e Novak Djokovic (ATP 2).

Wawrinka cunter Kyrgios?

Er Stan Wawrinka na po betg reclamar da la sort a l'Australian Open. Il Romand cumenza cunter il Slovac Martin Klizan (ATP 35). In vair test da furma è lura en l'otgavel final. Là pudess Wawrinka fruntar sin il matadur local e «enfant terrible» Nick Kyrgios (ATP 14). En il quartfinal pudessi dar il duel cunter il Croat Marin Cilic (ATP 7).

Bencic cun la pli greva sort pussaivla

Ils ultims trais onns è Belinda Bencic fruntada en las emprima rundas sin giugadras dal WTA-ranking 73, 80 ed 88. Quest onn spetga dentant ina pli dira nusch: Il numer 2 dal mund, Serena Williams. L'Americana è la «Queen of Melbourne» ed ha gia gudagnà sis giadas l'Australian Open. Timea Bacsinszky tutga en l'emprima runda sin la Taliana Camilla Giorgi e Viktorija Golubic cumenza cunter Kristina Pliskova.

RR novitads 06:00

Artitgels legids il pli savens