Siglir tar il cuntegn
Inhalt

Naziunal/Internaziunal Federer suenter dir cumbat en il mezfinal a Wimbledon

Roger Federer cuntanscha il mezfinal suenter in lung e dir cumbat cunter il Croat Marin Cilic. Il setdubel campiun da Wimbledon ha gudagnà en tschintg sets suenter ch'el ha pers ils emprims dus sets cun 6:7, 4:6, 6:3, 7:6 e 6:3. El ha stuì sa defender cunter trais ballas da match da Cilic.

purtret da Roger Federer
Legenda: Suenter in dir cumbat sa qualifitgescha Federer per il mezfinal da Wimbledon. Reuters

En ils emprims dus sets n‘ha Roger Federer chattà nagin recept cunter il Croat che ha sco usità fatg bler squitsch cun ses bun servis. En il terz set pareva il gieu ed uschia il turnier ton sco a fin per Federer. Suenter strusch in’ura e mez era il Svizzer enavos cun 6:7 e 4:6. Vitiers era el cun agen servis enavos cun 0:40, pia 3 schanzas da break per Cilic.

Punct da midada en il terz set

Davent da quest mument è bler sa midà en il gieu. Roger Federer è vegni pli ferms, Cilic perencunter ha fatg dapli sbagls. Federer ha pudì sa defender en quest game e gest silsuenter sez realisar in break. Quai è stà la midada, sche bain che Federer ha anc stuì cumbatter 3 bals da match en il quart set. Il 5avel set ha il Svizzer lura gudagnà grazia ad in break cura ch’igl steva 4:3.

Mezfinal cunter Raonic

En la proxima runda spetga ussa Milos Raonic (ATP 7). Il Canadais ha gudagnà en il quart-final cunter igl American Sam Querrey en quatter sets. Il gieu tranter Federer e Raonic è proxim venderdi.

RR novitads 18:00