Roger Federer survegn quest onn in’ulteriura schanza da gudagnar per l’otgavla giada ses turnier preferì. Federer, il numer 2 dal mund, è en furma e pront per Wimbledon. Quai ha el mussà cun sia victoria al turnier da preparaziun a Halle en Germania. Ils gronds rivals da Roger Federer èn er quest onn il serb Novak Djokovic, il defensur dal titel, ed il matador local Andy Murray.
Stan Wawrinka – il segund trumf svizzer
Sper Roger Federer ha la Svizra cun Stan Wawrinka anc in segund giugader ch’è bun da gudagnar il pli impurtant turnier da tennis dal mund. Wawrinka ha gudagnà quest onn il French Open a Paris e parta uschia cun gronda motivaziun vers Wimbledon nua ch’el n’ha dentant anc mai propi pudì brigliar. Dentant dapi bun trais onns sa senta er Stan Wawrinka meglier e meglier sin pastg. Avant in onn ha il Romand pers pir il gieu da quart-final encunter ses collega Roger Federer.
Bacsinszky e Bencic bunas per in exploit
Tar las dunnas datti sulet ina gronda favurita, l’Americana Serena Williams. Il numer 1 dal mund ha gia gudagnà quest onn l’Australian Open ed il French Open. Cun Timea Bacsinszky e Belinda Bencic èn era duas giugadras svizra bunas per in exploit. Oravant tut èn las spetgas grondas tar la giuvna da 18 onns Belinda Bencic. Ella vegn fitg bain a frida sin il pastg ed ha gudagnà la davosa fin d’emna ses emprim turnier da la WTA ad Eastbourne en l’Engalterra. Timea Bacsinszky è classada sco numer 15 dal mund, n’ha dentant anc mai pudì far furori al Grand Slam da Wimbledon. Pli lunsch che la segunda runda n’è Bacsinszky mai vegnida, insatge che l’actual meglra giugadra da tennis svizra vul midar quest onn.