Fernando Schmed campiun svizzer en il super-G

Fernando Schmed è per l’emprima giada campiun svizzer. Il skiunz da Sargans cun ragischs en Surselva ha gudagnà a Veysonnaz en il chantun Vallais il super-G.

Fernando Schmed durant ina cursa rapida a San Murezzan. Bild in Lightbox öffnen.

Legenda da maletgs: Fernando Schmed durant la cursa rapida dal campiunadi svizzer la fin mars a San Murezzan (6avel plaz). Keystone

Fernando Schmed ha triumfà en sia disciplina da parada cun in avantatg da 54 tschientavels avant Ralph Weber da Herisau. Sin plazza 3 è Gilles Roulin da Grüningen. Ils gronds favurits enturn Carlo Janka, Beat Feuz u Patrick Küng n’èn betg stads a la partenza.

Nagina surpraisa

Tuttina n’è il success da Schmed nagina surpraisa. Il skiunz da 23 onns aveva gia persvadì il davos en questa disciplina en la cuppa d’Europa. Tranter auter veva Schmed gudagnà il super-G a Sella Nevea en l’Italia. Grazia a sias bunas prestaziuns en la cuppa d’Europa ha Fernando Schmed er gudagnà in plaz fix la proxima stagiun en la cuppa mundiala.

Terza medaglia a campiunadis svizzers

Tut en tut ha Fernando Schmed uss gudagnà gia trais medaglias a campiunadis svizzers da skis. Il 2012 er’il skiunz da Sargans vegnì vice-campiun svizzer en la cursa rapida ed avant in onn terz en il super-G.

Jasmina Sutter sisum il podest

Tar las dunnas è Jasmina Sutter nova campiunessa svizra en il super-G. La skiunza da Stoos ha gudagnà avant Nathalie Gröbli da Emmetten e Michelle Gisin dad Engelberg.

Ils dus super-G fissan stads planisads la fin mars a San Murezzan. Pervia da la mal’aura han quellas duas cursas stuì vegnir spustadas. Il super-G dals umens è perquai stà a Veysonnaz, quel da las dunnas a Tavau.

RR novitads 14.00