Siglir tar il cuntegn
Inhalt

Naziunal/Internaziunal Fernando Schmed sin via da fitgar pe en la cuppa mundiala

4 cursas - 4 giadas en ils top 30 da la cuppa mundiala. Il skiunz da Sargans Fernando Schmed, ch'ha ragischs sursilvanas, è sin buna via da fitgar pe en la cuppa mundiala da skis.

Fernando Schmed
Legenda: Fernando Schmed ha persvas questa stagiun. Keystone

Grazia a ses buns resultats quest onn en la cuppa d'Europa ha il skiunz da 23 onns astgà partir las davosas fin d'emnas a dus super-G's e duas cursas rapidas da la cuppa mundiala a Saalbach en l'Austria ed a Kvitfjell en la Norvegia.

Nizzegià las schanzas

Fernando Schmed ha nizzegià quellas schanzas. Cun ils plazs 26 e 29 a Saalbach e cun ils plazs 30 e 25 a Kvitfjell n’ha il skiunz rumantsch betg mo gudagnà ses emprims puncts da la cuppa mundiala, mabain er mussà ch'el ha fatg in grond pass enavant en sia carriera e ch'el è sin buna via da tegnair pitg cun ils gronds. En la cuppa d’Europa è Schmed suenter sia emprima victoria la fin favrer classà sco quart en il classament da la disciplina super-G.

Gartegia quai a Fernando Schmed da far in pass enavant en ils top 3 en ils dus davos super-G’s da la stagiun ad Andorra, garantiss quai ad el in plaz fix la proxima stagiun en la cuppa mundiala.