Siglir tar il cuntegn

Header

audio
Sguard enavos sin las festas federalas da lutga 2010 – 2019
Or da Sportissimo dals 04.04.2020.
laschar ir. Durada: 20:57 minutas.
cuntegn

Festas federalas 2010-2019 Ils Bernais – ina classa per sasez

A las davosas quatter festas federalas da lutga è il retg mintgamai vegnì ord il medem chantun, il chantun Berna. Cunquai èn ils lutgaders Bernais ils gronds dominaturs dal davos decenni.

A la festa federala il 2010 a Frauenfeld ha Kilian Wenger triumfà. Il giuven da 20 onns aveva tranter auter battì en la 5avla lutga ses grond idol Jörg Abderhalden ch’ha gudagnà gist trais giadas il titel da retg da lutga. En la lutga finala ha Wenger mess en dies en il resgim Martin Grab.

Kilian Wenger
Legenda: Kilian Wenger – il retg 2010 a Frauenfeld Keystone

A la festa federala il 2013 a Burgdorf ha Matthias Sempach triumfà. En la lutga finala ha el battì ses collega Bernais Christian Stucki.

Matthias Sempach
Legenda: Matthias Sempach – il retg 2013 a Burgdorf Keystone

A la festa federala il 2016 ad Estavayer-le-Lac èsi vegnì en la lutga finala tar il duel tranter Matthias Glarner ed Armon Orlik da Maiavilla. Orlik avess gì la schanza da daventar l’emprim retg da lutga dal Grischun. Ma la finala èsi danovamain stà cun Glarner in Bernais ch’ha triumfà.

Matthias Glarner
Legenda: Matthias Glarner - il retg 2016 ad Estavayer-le-Lac Keystone

A la davosa festa federala il 2019 a Zug ha Christian Stucki encurunà sia carriera cun il titel da retg da lutga. Stucki ch’ha en sia carriera er gudagnà la festa d’Unspunnen e quella da Kilchberg ha uschia realisà il grand slam da lutga. En la lutga finala da Zug ha il Bernais battì suenter be 42 secundas il mattadur local Joel Wicki. Il Grischun Armon Orlik è vegnì terz.

Christian Stucki
Legenda: Christian Stucki - il retg 2019 a Zug Keystone

La proxima festa federala da lutga è il 2022 a Pratteln en il chantun Basilea-Champagna.

RTR Sportissimo 17:06