Las refurmas tar la Fifa survegnan ina sfessa. Domenico Scala, il schef da la cumissiun da gestiun, banduna la Fifa per immediat. L’uschenumnada cumissiun d’audit e compliance è ina da pliras instanzas da controlla da la Fifa.
El ha reagì cun sia visada ad ina decisiun da la suprastanza da la Fifa. Quella è vegnida autorisada d'eleger e da relaschar per in onn las atgnas instanzas da controlla.
Jau sun consternà da questa decisiun, uschia vegn ina pitga centrala da la direcziun da la Fifa sutminada ed acquisiziuns essenzialas da las refurmas vegnan destruidas.
«Ils gremis vegnan uschia facticamain privads da lur independenza», ha scrit il manader da la cumissiun da gestiun en sia decleraziun da demissiun.
Suenter blers scandals da reputaziun perda la Fifa uschia l’architect da l’agenda da refurmas da fin qua. Per il nov president Gianni Infantino è la demissiun da Scala ina schleppa delicata – Scala aveva gia dubità la prontadad per refurmas da la Fifa sut Infantino.
RR novitads 16:00 / 18:00 / RR Sportissimo 17:00