Quest termin per in congress extraordinari haja il comité executiv concludì a Turitg, ha communitgà la Fifa. Fin uss quintavan ins cun in termin il december da quest onn per l’elecziun dal president.
Ina nova cumissiun
Vinavant vul il comité executiv da la Fifa ina nova cumissiun per manar e survegliar las refurmas da la Fifa. Emprims resultats duaja gia dar per la proxima sesida regulara dal comité la fin da settember, ha ditg il president da l’Associaziun tudestga da ballape Wolfgang Niersbach. I fetschia prescha da vegnir a fin cun quest process da refurma.
Blatter chala definitivamain
Il president partent, il Svizzer Sepp Blatter, ha exclus da candidar in’ulteriura giada per l’uffizi. Quai ha Blatter ditg a chaschun da la conferenza da medias suenter l’inscunter dal comité executiv da la Fifa. El aveva annunzià da vulair sa retrair, suenter ch'il pli grond scandal da corrupziun en l’istorgia da la Fifa era vegnì scuvert.
In incap malempernaivel per Blatter
A l'entschatta da la conferenza da pressa da la Fifa il glindesdi suentermezdi ha il comicher britannic Simon Brodkin, ch'era sa dà ora sco schurnalist, bittà bancnotas da termagls sin Sepp Blatter. Quai ha gì per consequenza che la conferenza è vegnida interrutta per intginas minutas.
