Naziunal/Internaziunal - Fin da carriera per Filipe Massa
Il Brasilian che ha 35 onns ha communitgà ch'el termineschia sia carriera. Quai ha el ditg en il parc rojal da Monza, a l'ur da la cursa tradiziunala da furmla 1. En quest lieu aveva er Michael Schumacher annunzià sia fin. La stagiun 2006 era Massa en il team cun Schumacher.
Massa pilotescha dapi il 2014 in auto da Williams. Avant er'el stà engaschà onns a la lunga tar Ferrari ed al cumenzament da sia carriera tar Sauber.
Massa ha fatg 242 cursas da furmla 1 ed ha gudagnà 11 da quellas.
Il 2008 è el daventà vice-campiun mundial. L'emprim aveva si'equipa cumenzà a giubilar perquai ch'ella aveva cartì ch'el saja campiun mundial. Il plascher ha durà mo paucas minutas. Lewis Hamilton, ch'era vegnì tschintgavel, era sulettamain in punct avant Massa.
