Naziunal/Internaziunal - Fin da la stagiun per Elias Ambühl
Bain ha il skiunz da freestyle grischun Elias Ambühl gudagnà la dumengia als X-Games ad Aspen la medaglia da bronz en il Big Air. Mo tar ses davos sigl è el atterrà uschè disgraziadamain, ch'el è sa blessà vi dal schanugl.
Cun atterrar haja da ina sturschida ad el, ils skis hajan tschiffà andetgamain en la naiv che tatgava, ha il Grischun da 23 onns ditg. Sco la consultaziun medicinala ha demussà uss, ha Ambühl stgarpà ils lioms cruschads dal schanugl sanester. Cun quai na po el betg pli sa participar a concurrenzas per questa stagiun.
