La nova halla da trenament è 65 meters lunga, 45 meters lada e 10 meters auta. 500 meters cubic lenn èn vegnids duvrads per la construcziun da la nova halla da trenament dil club da hockey da Tavau. Medemamain vegni producì solar sin il tetg e vid la fatschada. Architect da l'entir project è stà Gian Fanzun. El ha dastgà construì la halla sin la patinera da glatsch gia existenta gist tar il stadion da hockey Vaillant Arena. La halla ha en tut custà 8 milliuns francs.
Surmuntar la sanaziun da la Vaillant Arena
Bajegiada è la halla da trenament vegnida pervia da la sanaziun dil stadion da Tavau. Suenter questa stagiun, pia la primavaira, n'èsi betg pli pussibel da trenar en la Vaillant Arena enfin la fin november. Durant la stad vegn sanà il stadion grond ed uschia han ins stuì construir in'alternativa, per ch'ils profis possian vinavant trenar. La sanaziun vid il stadion grond duai esser terminada sin l'onn 2021.
Betg mo in project a curta vista
Il nov edifizi è equipà cun differentas installaziuns: Uschia è per exempel vegnì montà ina construcziun speziala per trenar sajets, in center da trenar golis ed in indriz per mesirar spertadad. Pia en emprima lingia per ils profis. Dentant vulan ins duvrar enavant la halla nova era cura ch'ils profis turnan en il stadion grond:
Pervi da la naiv e la plievgia n'han ils juniors betg pudì trenar bleras giadas. Uss cun ina halla da trenament po era la giuventetgna trenar independent da l'aura.
RR Sportissimo 12:00