Siglir tar il cuntegn

Naziunal/Internaziunal Froome avant 3. victoria dal Tour de France

Chris Froome ha gudagnà la 18avla etappa dal Tour de France. Il Brit ha mussà en la cursa cunter l’ura en las muntognas anc ina giada quant ferm ch’el è uschia ch’el vegn fitg probabel a gudagnar il Tour de France per la 3 giada.

La terza victoria dal Tour de France è prest betg pli be in siemi per Chris Froome.
Legenda: La terza victoria dal Tour de France è prest betg pli be in siemi per Chris Froome. Keystone

Chris Froome è vegnì pli e pli ferms, pli ditg che la cursa da 17 km en las muntognas da Sallanges a Megève ha cuzzà. Tar l’emprim temp intermediar era il Brit anc davos l’Ollandais Tom Dumoulin. El ha lasuenter dentant pudì reducir constantamain adina pli fitg il retard, uschia ch’el era lura suenter il terz temp intermediar avant Dumoulin. En l’arrivada ha Froome lura gì 21 secundas avantatg sin il segund.

Prest 4 minutas en avantatg

Froome ha uschia, 3 etappas avant la fin dal Tour de France da quest onn, gia in avantatg da 3:52 minutas sin il segund en classament general Bauke Mollema e 4:16 sin il terz Adam Yates. Damaun venderdis e la sonda datti anc duas etappas en las alps. Dumengia è l’ultima etappa che va a fin sco mintg’onn a Paris.

RR novitads 18:00