Siglir tar il cuntegn
Inhalt

Naziunal/Internaziunal Froome perda il «maillot jaune»

Sin ils davos meters, la davosa rampa, da la 12avla etappa dal Tour de France ha il ciclist brit Chris Froome per il «maillot jaune» al Talian Fabio Aru. Gudagnà quest’etappa da Pau vers Peyragoudes ha il mattadur local Romain Bardet.

Chris Froome e Fabio Aru.
Legenda: Ils dus gronds favurits dal Tour de France, Chris Froome e Fabio Aru. Keystone

La 12avla etappa ha purtà enavos tensiun al Tour de Francs. Suenter ch’il Team Sky, l’equipa da Chris Froome, ha giu tut sut controlla enfin ussa è il Brit per l’emprima gia vegnì sut las rodas.

Froome po betg reagir

Suenter in’attatga dal Talian Fabio Aru n’ha il traidubel victur dal TdF Chris Froome betg pli pudì reagir. Sin ils davos tschients meters ha Froome la finala pers 22 secundas ed uschia er il «maillot jauney». Fabia Aru è sco terz da l’etappa e grazia ad intginas secundas bunificaziun il nov leader dal Tour de France.

Cuntanschì sco emprim la lingia da l’arrivada ha Romain Bardet. Il Franzos ha triumfà duas secundas avant il Columbian Rigoberto Uran e Fabio Aru. Anc avant Froome ch’è vegnì 7avel, han cuntanschì l’arrivada Mikel Landa, Louis Meintjes e Daniel Martin.

Classament general:

  • Fabio Aru (It) 52:51:49
  • Chris Froome (Gb) +0:06
  • Romain Bardet (Fr) +0:25

La 13avla etappa da venderdi, ils 14-07, è danovamain en las Pireneas. Sin il tschancun da 101 kilometers da Saint-Girons a Foix han ils ciclists da surmuntar gist trais culms d’emprima categoria.